12 April, 2012

အင်တာနက်ပေါ်က ဆရာတွတ်ပီများနှင့် ညီမလေးအတွက် ရေကြည်ချမ်းမြ (ကဗျာ)

ညီမလေးရေ..
ဝိုင်ယာမဲ့နည်းပညာမြင့်
ကမ္ဘာကြီးကိုဖြတ်သန်းတဲ့အခါ
ကျည်ကာအင်္ကျီဝတ်ပါ။

ကိုယ်ခံအားကောင်းအောင်
လေ့ကျင့်ပါ။
တိုက်ပွဲတွေမှာ
ခံစစ်ကိုသတိထားပါ။

တခါတခါ
အင်တာနက်ဆိုတာ
အင်ထုထားတဲ့တွင်းနက်နက်ကြီးပါကွယ်
ဖေ့ဘွတ်စ်ကတော့မာယာများတဲ့တောပေါ့
မက်ဆင်ဂျာစကိုင်းပိတွေနဲ့လိုင်းငြိနေသူတွေလည်းရှိတယ်

ညီမလေးရေ..
၂၀ ရာစုမြေခွေး ရုပ်ရှင်ကားတွေကြည့်ရင်း
၂၁ ရာစုဝံပုလွေတွေအကြောင်းစဉ်းစားရတာစိတ်ဝင်စားဖို့ကောင်းပါတယ်။
အိုဘားမားကတော့ဗမာပြည်ဟာသူ့အောင်မြေလို့ကြွေးကြော်နေလေရဲ့
ကြံ့ခိုင်ဖွံ့ဖြိုးရေးပါတီလည်းယတြာချေဖို့ကြံနေတယ်
သင်္ကြန်စာမှာတော့ဗိုလ်ချုပ်မူးကြီးမင်းအောင်လှိုင်အကြောင်းမပါဘူး
တိဘက်တွေသနားပါတယ် ညီမလေးရယ်
ပေါက်ဖော်ကြီးတို့လူပါးဝလွန်းတယ်

အသစ်စက်စက်မြန်မာပြည်မှာတော့
ဖောင်ဒေးရှင်းတွေပေါတယ်။
ရပ်ကွက်ထဲမှာတော့
ဆင်းရဲသားတွေပေါတယ်။
ဖေ့ဘွတ်စ်မှာတော့
သူရဲကောင်းတွေပေါတယ်။
အီးမေးထဲမှာတတ်ယောင်ကားတွေပေါတယ်။
ရုပ်ကြမ်းဝါဒီလူမိုက်တွေလည်းရှိရဲ့။
ဗမာပြည်ကိုကယ်တင်မယ်လို့ပြောတယ်။
ဆရာတွတ်ပီလိုပဲ
အမှောင်ခေတ်မှာ လူညံ့တွေပေါလွန်းလှချေရဲ့ကွယ်။

အကိုကတော့
ကွန်ပြူတာထဲ ဗိုင်းရပ်ပ်စ်ပိုးတွေမ၀င်အောင်
ကြိုးစားကာကွယ်နေရတယ်။
ဦးဏှောက်ကို လေစိမ်းတွေအတိုက်မခံရအောင်
မနည်းကာကွယ်နေရတယ်။
နှလုံးသားတွေအေးခဲမသွားအောင်
အချစ်စိတ်များများမွေးမြူနေရတယ်..

ညီမလေးရေ..
စာဆိုတိုင်းလည်းသွားမဖတ်လေနဲ့
လင့်ခ်တွေ့တိုင်းလည်းမကလစ်မိစေနဲ့
အမြင်မတော်တိုင်းလည်းဝင်မပြောနဲ့
ဓါတ်ပုံမြင်တိုင်းလည်း Like မလုပ်နဲ့
အုပ်စုတိုင်းမှာလဲဆွဲအထည့်မခံနဲ့
သူငယ်ချင်းလက်ခံတာလည်းသတိထား
အရာရာချင့်ချိန်ပါ၊ စဉ်းစားပါကွယ်။

အမှိုက်တွေလာတင်ရင်ဖယ်ထုတ်လိုက်ပါ။
ပတ်ဝန်းကျင်က
အသုံးမ၀င်တဲ့ပစ္စည်းတွေပေးရင်လည်း
အသုံးဝင်တဲ့ပစ္စည်းတွေပဲ
ပတ်ဝန်းကျင်ကိုပြန်ပေးလိုက်ပါ။
ကမ္ဘာမြေကို..
ချစ်ခြင်းမေတ္တာပဲပေးပါ
ချစ်ခြင်းမေတ္တာပဲယူပါ။

ဘာပဲဖြစ်ဖြစ်..
ဘယ်လိုပဲဖြစ်ဖြစ်..
အပြုံးပဲဖြစ်ဖြစ်..
အမုန်းပဲဖြစ်ဖြစ်..

ညီမလေးရေ..

ဟင်းလင်းပွင့်ကောင်းကင်အောက်မှာ
ပိတောက်တွေပွင့်ပြီကွယ်။
ဖေ့ဘွတ်စ်ပေါ်ထိန်ထိန်တောက်လို့
ပွင့်ပြီကွယ်။
ဘလော့တွေမှာလည်း…သင်္ကြန်ကျနေပြီ။
အင်တာနက်ပေါ်..ရေတွေစိုစိုရွှဲ။
အီးမေးတွေမှာလည်း..ဗွက်ထနေပြီ။

မနက်ဖြန်ခါဘာဖြစ်ဖြစ်ပါ..
နောင်နှစ်ခါဘာဖြစ်ဖြစ်ပါ..
မေတ္တာရေစင်အေးတစ်ခွက်ကို
ယုယကြင်နာဖျန်းပက်လိုက်ပါတယ်။
ကြည်နူးဖွယ်နှစ်သစ်ကူးပါ။
မင်္ဂလာဖြိုးဝေ..
အလှကျက်သရေတိုးပါစေကွယ်။….။

ငြိမ်းချမ်းအောင်
(ဧပြီ ၁၁၊ ၂၀၁၂)

No comments: